A PREZO (de ouro)

Eva Wein

Entregar derrotas húmidas
a xogo coas túas medias negras.
Apostar sen fondos nun crime pintado
a sangue quente.
Voltar a ser okupa dos teus antollos
requisados pola vida.
Catalogar estertores por onzas
nunha rúa sen saída.
Relear o vento cos petos baldeiros
no mercado das túas costas.

PD:Non quero tomar LK con Mr Feijoo os vindeiros 4 anos

MARTES (e cinzas)

Eva Wein

Esta mañá erguinme
cos miolos nunha gamela lonxe do peirao,
cun almacén de ferralla no corazón
e ese sabor a metálico,
no padal da noite.
Hoxe protexerei os andares
cunhas luvas de caucho
pra camiñar o día.

UNHA (de Antroido)

Eva Wein

Fuxir por horas na compaña dos meus esgotando as reservas do negro café na Limia la nuit. Camiñar por rúas onde ninguén é quen parece ser, ou si, mentres dous esquimais espantan a friaxe a bicos entre muros de pedra. Mirarme Merlín, agocharme de min mentres queimo as follas dos calendarios con restos de bica nos beizos. Esta noite por uns intres, habitei o país da troula e a evasión e recibín á alborada, cun sorriso como pronto e pago e mais vello que Deus.

INSOMNIO (encamiñado)

Eva Wein

Esta noite toca...
catalogar ovellas e clausurar as capelas dos ollos
pra mirarte espida, mentres intimo con morfeo.

FUXIDAss

Eva Wein

Hoxe tan só quero que me enchas o peito de terra,
pra agromar unha árbore enferma e reincidente.
Hoxe boto de menos,
todas as miñas ausencias en fuxida.

UNHA (de pantasmas)

P.T por Eva Wein

Quen leve as miñas pantasmas non leva regalía.
Quen leve as miñas pantasmas leva
un bico torcido pola vida,
unha participación na derrota da noite,
os restos do que fun,
os excesos do que son,
a porfía na vértixe dos teus quizás,
un país sen exercito,
un aloumiño de rebaixa.

Quen leve as miñas pantasmas non leva cousa boa.
Quen leve as miñas pantasmas leva
un gabán con restos de piche nos petos,
a desvergoña de disparar sen armas,
os corpos das mulleres que non eran o teu corpo,
as veces que quixen gañar pra perder,
os quilómetros feitos pra ir a ningures,
un corazón vendido a prazos.

Quen leve as miñas pantasmas non leva un tesouro.
Quen leve as miñas pantasmas leva
un pousar treboento,
unha invernía abafante,
dous bancos que quixen atracar,
tres irmáns da tralla brava,
un carro de engurras con pedigree
e o traste que te fita espida,
na señardade do teu colchón.

RENDICIÓN

Eva Wein


Esta noite toca
canear a morfeo,
esgotar a mina do lapis
perder o xuizo da moa
investir nun ging
desterrarse en nunca mais
intimar coa túa sombra
e poñer as verbas
con acta de rendición
aos teus pes.

GUSTOS (caros)

Eva Wein

Andar en bici polo asfalto mollado da túa pel
sen sinais de tráfico nin policias.
Disparar bicos polas túas costas en noites de choiva
baixo un edredón autárquico.
Mercar os teus beizos por renting sendo un mal pagador
dos teus si enlatados.

de DOMINGOS

Eva Wein

Este Domingo espertei, farto das resacas que deixan borras de melancolías no café mollado co xornal, canso de ser un arraiano nos ángulos das túas cadeiras, descreido da parella de ases de man que todo prometen e todo quitan e preguiceiro desta semana requecida que entra asubiando unha canción garrafón.

*Parabéns a Marci polo parzamique escrito coa tinta do corazón

RECARGA

Franético por E.Wein

A falta de xeo botarémoslle limón conxelado, poñerémosnos ao día, remataremos a botella de Habana, apuraremos as verbas e investiremos historias na rúa, nos locais que pechan por xubilación, nas mulleres que fuxen deixándonos unha memoria nos beizos e nas comunidades de veciños que deciden en xuntanza democrática que as obras do tellado empecen cando a empresa este libre.

Mirar por horas a este home barbado é unha regalía xa que podo recoller nel aos amigos ausentes, marcarme co salitre e voltar a casa asubiando unha canción nun carro musicado sen Tom Tom.

EGO

Eva Wein

Hoxe decidín
deixar de mirarme o embigo do corazón.

"COUSA NOSA"

Percorrer os anos 20 da lei seca e o mandato da pólvora con exceso de enol e disparos de amizade estivo moi ben.

Facelo na compaña dos teus e coa música en directo das Batuko Tabanca, Xurxo Souto, Susana Seivane, Bocixa (Zenzar), Ico (O Sonoro Maxín-Lamatumbá), Pulpiño Viascón, Guadi Galego, Uxía Senlle, Rómulo Sanjurjo e a presenza das Garotas da Ribeira e Carlos Blanco non ten prezo.

Moito Obrigado a Manolo e a Natalia polo convite e a festa.